Ólöf Helga

	Hún var heima hjá mömmu sinni fyrsta árið en svo byrjaði hún hjá Fríðu dagmömmu í ágúst 2002. Haustið 2004 fékk hún pláss á leikskóla.
Ólöf datt á leikskólanum föstud. 7. okt. 05. Hún fékk stóran skurð á hökuna og það þurfti að sauma 7 spor. Hún var mjög dugleg, grét aðeins á meðan var verið að deyfa en svo tók hún gleði sína á ný. 28. okt. 05: Ólöf var búin að fá leyfi til að gista hjá Guðnýju. Við systur vorum í bænum með Ólöfu, Jóhann og Guðrúnu Maríu til að kaupa afmælisgjöf fyrir Guðmund. Ólöf vildi kaupa sér eitthvað bleikt, glitrandi glingur og ég sagði alltaf nei. Þá sneri hún sér allt í einu að mér og sagði: Þú ræður nú eiginlega ekki yfir mér núna. Síðan gekk hún til Guðnýjar og spurði hana hvort hún mætti kaupa glingrið.
	Jan.06: Við mæðgur vorum í Hagkaup að kaupa í matinn. Ég var að leita að græmetisbuffum Sollu og spurði afgreiðslukonu eftir þeim. Þá sagði Ólöf: ætlarðu að kaupa buff fyrir mig? Ég sagði já og fyrir mig líka. Þá sagði Ólöf: en það passar ekki, þú ert með of stóran haus! Hún var að meina höfuðklút (buff) með Sollu stirðu.
Ólöf er svo liðug að það er enginn vandi fyrir hana að nota ilina á sér fyrir síma. Hér á myndinni er hún að þykjast tala í símann. Ólöf prófaði að fara í fimleika en fannst ekkert gaman. Henni finnst bara betra að æfa sig heima að fara í split og spíkat. Það nýjasta er að reyna að standa á haus út á miðju gólfi.
	Þarna heldur Ólöf á nýfæddum frænda sínum, Sigurði Frey. Þessi mynd var tekin 3. október. Ólöf er byrjuð í fimleikum, hún segir að það sé stundum gaman en stundum leiðinlegt. Ég held að henni þyki leiðinlegt að fá ekki að stjórna neinu. Hmmm ... hvaðan kemur þessi stjórnunarárátta í þeim systrum?
Nóv.06: Við mæðgur vorum að baka piparkökur í rólegheitum í lok nóv. Við vorum að hlusta á tónlist og ég hummaði með. Þá segir Ólöf allt í einu: Mamma geturðu hætt þessu? Ég svaraði: Finnst þér ég ekki syngja vel? Þá segir Ólöf: Sko, þegar þú ert orðin fullorðin og tekur þátt í Eurovision, þá vinnur þú ekki! Þar með var það útrætt og ég hætti auðvitað að syngja.